About Us

Diskors tal-E.T. George Vella, President ta’ Malta fl-okkażjoni tat-tnedija tal-Fundazzjoni għat-Trasport
27 ta’ Novembru 2020
Palazz Sant’Anton, Ħ’Attard

On. Ministru Dr. Ian Borg

Sinjuri,

Nilqagħkom bi pjaċir fil-Palazz ta’ Sant’ Anton għal dan l-avveniment importanti, u nsellem lil dawk kollha li tkellmu qabli.

Naħseb li lkoll naqblu, li kien ilu li wasal il-mument, biex f’dal-pajjiż, is-settur tat-Trasport tingħatalu l-importanza u s-serjeta’ u l-istudju li jixraqlu.

Dan mhux settur faċli biex wieħed jitkellem fuqu għax huwa vast ħafna.

Filwaqt li huwa settur minnu nnifsu u li għandu l-karatteristiċi tiegħu, il-problemi tiegħu, l-opportunitajiet li jaf joffri dan is-settur, jorbot ukoll ħafna mal infrastruttura in ġenerali tal-pajjiż, mal-iżvilupp, mal-ħarsien tal-ambjent u mal effiċċjenza tal-intrapriża u l-kumdità taċ-ċittadin u dan rajnieh iseħħ dan l-aħħar.

Bħal setturi oħra hawn Malta, dan sikwit iwassal għal diskussjonijiet imqanqla fejn kulħadd – kif inhu xieraq – iwassal il-messaġġ tiegħu. Ħafna fil-kuntest lokali sikwit jorbtu dan il-qasam biss mal-bini ta’ toroq ġodda, id-diffikultajiet marbuta mat-trasport pubbliku, u l-konġestjoni mit-trasport privat.

Dan huwa żbaljat u hemm bżonn li nħarsu lejn il-firxa wiesgħa u l-importanza, tad-diversi angoli u mezzi tat-Trasport.

Insemmi l-iktar ħaġa bażika għalina bħala gżira.

Ftit jieqfu u jixtarru kif Malta tkun iżolata, mhux kompetittiva jew attrajenti għall investiment, u mingħajr turisti, li kieku ma bnejniex tul is-snin infrastruttura tat trasport marittimu u tal-avjazzjoni li huma b’saħħithom.

Dawn iż-żewġ oqsma issa saru parti fundamentali u ħaġa waħda mat-tkabbir ekonomiku ta’ pajjiżna. Dawn poġġew lil pajjiżna fuq quddiem tar-reġjun bħala ċentru ewlieni fil-loġistika.

Ilkoll missjena b’idejna x’ifisser li pajjiżna jiġi iżolat, hekk kif beda jberraq bil Pandemija tal-COVID.

Bl-għaqal li nafu naħdmu bih aħna l-Maltin u l-Għawdxin, dan ma seħħx. Hawnhekk irrid inrodd ħajr lill-ħaddiema kollha li b’xi mod kienu u għadhom involuti f’dan il-qasam, tal-isforzi li għamlu sabiex ir-rota sal-lum baqgħet iddur.

Sinjuri,

Illum qed nara b’sodifazzjon element ta’ viżjoni ħolistika u matura li biha qed jiġi indirizzat il-ġejjieni u t-titjib mixtieq fis-settur tat-Trasport, hekk kif nibtet kooperazzjoni – J’ Alla dejjiema – bejn entitajiet direttament involvuti.

Qed nirreferi għal-Transport Malta, il-Kamra tal-Kummerċ għall-Intrapriżi Żgħar, Il-Kunsill għall-Arti, Xjenza u Teknoloġija, l-Assoċjazzjoni ta’ Min Iħaddem u l-Malta Enterprise. Għandi nifhem li numru ta’ entitajiet oħrajn qegħdin ukoll iħarsu lejn din il-kollaborazzjoni b’mod pożitttiv u jaf jingħaqdu wkoll biex jagħtu sehemhom f’dan il-proġett, aktar ‘ l quddiem.

Dan huwa eżempju ta’ kif is-soċjetà tagħna għandha tibda’ tħares lejn suġġetti li minn-natura tagħhom għandhom effett dirett fuq firxa wiesgħa ta’ oqsma kemm soċjali kif ukoll ekonomiċi u li jiddependu fuq kkoperazzjoni studjata u serja biex jagħtu riżultati bħal dan tat-Trasport.

F’każi bħal dawn hemm bżonn li jkollna diskussjonijiet inklussivi u ħolistiċi, ‘l bogħod mill-kontroversja u l-politika partiġġjana.
Nixtieq nara dan il-mudell jiġi ripetut f’oqsma oħra.

Il-Fundazzjoni li qegħdin tniedu llum hija wkoll tieqa fuq il-ġejjieni.
Bi pjaċir ninnota kif li l-innovazzjoni u t-taħriġ ser jieħdu post ċentrali fil-ħidma tal-Fundazzjoni.

Meta nsemmi taħriġ mhux qed nirreferi biss għal per eżempju operatur, impjegat jew inkella intraprenditur li ser ikun jista’ jsegwi lectures jew seminars speċjalizzati – iżda wkoll għaċ-ċittadin innifsu.

Fl-aħħar mill-aħħar, l-isforzi li ser isiru mhux ha jkunu ta’ benefiċċju lil xi setturi partikolari biss, iżda lill-pubbliku in generali. Għalhekk m’għandha tonqos qatt l-informazzjoni dwar servizzi eżiżtenti u oħrajn ġodda, x’ wieħed għandu jagħmel u x’ m’għandux.

Il-professjonalità hija ċentrali u għandna naspiraw għall-infrastruttura, servizzi, u uffiċċjali imrawma fl-aqwa livelli. Tajjeb li fost l-għanijiet tagħha il-Fundazzjoni ser tkun qed tinvesti f’sistema ta’ kuntatti ma’ operaturi u entitajiet simili, barra minn Malta u fuq livell internazzjonali.

Hemm ħafna x’wieħed josserva, u fejn hu applikabli, jiġu introdott fis-sistemi tagħna. Mill-banda l-oħra naf biċ-ċert li dak li rnexxielna niksbu bħala pajjiż, jaf jiswa’ ta’ mudell għal pajjiżi b’daqs u karatteristiċi oħra bħal tagħna.

Irrid nagħmel appell, biex f’dak kollu li se nagħmlu, li naf li rridu jew ma rridux ser ikollu effett fuq l-ambjent ta’ madwarna, tingħata priorita’ lill-ħarsien tal ambjent naturali tagħna, u biex inkomplu inħabirku u nagħmlu dak kollu possibbli biex kemm jista’ jkun apparti dan jitnaqqas it-tniġġis fuq l-art, fl-ajru u fl-ibħra tagħna.
Ejjew inżommu f’moħħna l-obbligu li għandna bħala gwardjani tal-wirt naturali li writna u noqgħodu attenti li nħallu pajjiżna f’qagħda sostenibbli, nadif u fuq kollox b’saħtu aktar milli sabuħ il-ġenerazzjonijiet tagħna.

Nifirħilkom għal dan il-pass importanti li qegħdin tieħdu u nixtieqilkom kull suċċess.

Grazzi.